हाम्रो मुलुकमा २००७ साल पछि मात्र शिक्षाको प्रचार प्रसार तथा विद्यालय, विश्वविद्यालयको विस्तार र विकास हुँदै आएको पाइन्छ । यसै क्रममा यस हाङपाङ गा.वि.स.मा पनि जनतामा शिक्षाको आवश्यकता महसुस हुँदै आयो । फलस्वरूप वि.सं.२००६ साल माघ २५ गते श्री पञ्चमीको दिन यस श्री सरस्वती मा.वि. हाङपाङको जन्म एउटा हिँउदे गुरुकुल पाठशालाको रुपमा छाप्रोमा भएको हो । तत्पश्चातको विकाशक्रमलाई हेर्दा यो विद्यालय २००७ सालको परिवर्तन संगै स्थापना भएको बरबोटे प्राथमिक विद्यालय र राजेश्वरी प्रा.वि. २०११ सालमा एकिकरण भई सरस्वती प्रा.वि. मा परिणत भयो, त्यही प्राथमिक विद्यालयनैं २०१४ सालमा सरस्वती मिडिल स्कूल, २०१८ सालमा डि.एस.वि. हाई स्कूलमा परिणत भयो र २०२२ साल पौष २२ गते माध्यमिक तह स्वीकृत भइ २०२२ सालमा यस विद्यालयबाट पहिलो ब्याज एस.एल.सि. परीक्षामा सम्मिलित भयो । २०३३ सालमा यो विद्यालयको नाम डि.एस.वि. हाई स्कूलबाट सरस्वती माध्यमिक विद्यालय रहन गयो । २०६३ सालमा १०+२ को पढाइ सुरु भएपछि विधिवत रुपमा २०६४ साल आषाढ ८ गते उच्च माध्यमिक विद्यालयको अनुमति प्राप्त भयो । यसै गरी वि.स. २०७४।०३।२५ को नेपाल सरकार शिक्षा विभागको पत्रानुसार नमुना मा.वि.को रुपमा छनौट भई नमुना विद्यालय गुरुयोजना आठराइै त्रिवेणी गाँउ पालिका बाट मिती २०७५/११/०६ मा गुरुयोजना स्वीकृत भएको थियो र मिति २०७९/१२/२९ गते प्राविधिक धार ९कक्षा ९–१२ पशु विज्ञान तर्फ स्वीकृत भई विद्यार्थीहरु अध्ययनरत रहेको छन् ।